АТЫРАУДА АЛҒАШ РЕТ ЕРЕКШЕ БАЛАЛАР ҚЫЗМЕТ ЕТЕТІН ИНКЛЮЗИВТІ КОФЕХАНА АШЫЛДЫ
Атырауда алғаш рет инклюзивті бағыттағы кофехананың ашылу рәсімі өтті. Жаңа бастама «Белес» жобасы аясында «Зейін Атырау» орталығы жанынан ашылды.
Бұл тең мүмкіндіктерді қолдайтын, қоғамның саналы өзгеруіне үлес қосатын орын болмақ. Ерекше жандардың еңбекке араласуына мүмкіндік беріп, олардың әлеуметтік және кәсіби дағдыларын дамыту мақсатында ұйымдастырылған әлеуметтік жоба аясында 10 бала жұмыспен қамтылып, қызмет көрсететін болады. Сонымен қатар, мұнда балалардың дайындаған қолөнер бұйымдары да сатылымға шығарылады.
“Зейін Атырау” орталығының басшысы Әнуар Бағытжанұлының айтуынша, бұл жоба еңбек нарығында қиындыққа тап болған жандарға қолдау көрсетіп, өздеріне деген сенімділікті арттыруға көмектеспек. Сондай-ақ, ол барлығына тең қарым-қатынасты орнатуды көздейтін бұл жоба инклюзивті ортаны қалыптастырудағы алғашқы қадам екенін жеткізді.